٣٠‏/١٢‏/٢٠٠٦

إعدام صدام حسين و ترك محمود بكر يعلق من منازلهم


أتعجب بشدة من رفض أو تعجب أو صدمه أي عربي من إعدام صدام حسين الراجل كان عميل للأمريكان ربوه و كبروه و دخلوا العراق في حروب بسذاجته و إنسياقه وراء توجيهات الأمريكان حتي دخلوا العراق بعد أن أنقلب عليهم صدام , و لم يكتفي صدام طوال حكمه بإنهاك إقتصاد واحدة من أغني الدول العربية في الحروب ده كمان ظبط كل طوائف العراق من أكراد و شيعة و سنة كمان ,صدام كان رئيس خائن للأمانة رئيس خان أتباعه - راجعوا ملف صعود صدام- صدام خان شعبه و خان الأمانة و أي أمانة مش شيك بمليون جنية دي بلد بحالها ورطها منذ صعودة السياسي و حتي إعدامه ,قد يري البعض أن فكرة إعدام رئيس دولة من بلد زي أمريكا شيء كافي للتعاطف معه ولكن الرؤية الصحيحة للموضوع هي إعدام عميل بواسطة رئيسه و لا يمنع ذلك عن الطرفين أن نكرهم , نكره أمريكا عند تحتل العراق و لكن لا ننسي أن السبب في ذلك هو سياسة العميل صدام .

صدام حسين أعدم و لن يضار العراقيين من إعدامه بقدر ما أضيروا من حياته , و في خضم هذه الأحداث و وسط توقعات الجميع بهزيمه لا بأس بها للزمالك من المارد الأحمر العائد لتوه من سلسلة إنتصارات كبيرة اصطدم بالمعلق الفضائي محمود بكر عم محمود الذي أنتهج أسلوب جديد في التعليق و هو التعليق من منازلهم عم محمود أستحضر أرواح إبراهيم و حسام حسن في مباراة الزمالك و الأهلي و الحمد لله أنه لم يستحضر روح الخطيب أو الضوظوي , محمود بكر فأجا الجميع بتعليق لا يشوبه أي صحه كان يعلق و كأ،ه يعلق من تلفزيون أبيض و أسود 14 بوصة كان يقول عن طارق السيد وائل القباني و أبو العلا كان حسام حسن و عبد الواحد السيد في أحد الفاولات تجرأ و وقف في الحيطة بتاعت الزمالك لم أتحمل هزي الأستاذ محمود و أضطريت لاستخدام الزرار المعجزة ميوت لأخلص عقلي من هذا التشتيت و منذ هذه اللحظة استطعت متابعة المباراة بسهولة و كمان كنت بأعلق عليها براحتي عموما هارد لاك للزمالك عمل ماتش جامد و مبروك للأهلي الذي يستحق هذا الفوز و ليذهب صدام حسين و محمود بكر للجحيم



٢٩‏/١٢‏/٢٠٠٦

أم هداياكي يا مصر**








أنا أسف يا جماعة دي أول مرة أستخدم ألفاظ قبيحة علي البلوج بس المرة دي الموضوع خارج عن إرادتي ما قدرتش أتحمل .
أثناء جولتي المعتادة بين صفحات الإنترنت وجدت هذا الخبر علي موقع جريدة الهيرالد تريبيان نقلاً عن وكالة رويترز تفاصيل الخبر تقول أن مصر أرسلت سلاح عبر إسرائيل و بموافقتها لمحمد عباس رئيس فلسطين و حركة فتح , و تعتبر هذه هي المرة الأولي التي ترسل فيها مصر سلاح للسلطة و لا ترفض إسرائيل و لا نسمع الكلام المتكرر بأن مصر ترسل سلاح سراً للسلطة لمحاربة إسرائيل و لكن هذه المرة الوضع متغير لأن السلاح هذه المرة ذهب للسلطة الفلسطينية لتحارب بيه حماس الفلسطينية و هو أكثر مما تحلم بيه إسرائيل حرب أهلية لم أري أو أقرأ أو أسمع عن دولة محتلة لمدة خمسين عام و يحدث فيها حرب بعيدأ عن المحتل ,أرسلت مصر لفتح سفينة محملة بألفين من الرشاشات الأوتامتيكية و عشرين ألفاً من الخزن و مليوناي رصاصة تري كم فلسطيني سيقتل بهذا السلاح مئات الألاف بالطبع و هذه المرة تقدم مصر للعدو الإسرائيلي خدمة العمر تشعل حرب أهلية داخل فلسطين بعد دورها القذر في لبنان بصراحة أنا مش قادر أكمل كتابة مش عارف نقول إيه للأرامل من زوجات شهداء حماس و فتح في هذه الحرب مش عارف كيف ينام الرئيس لا مش رئيس بل الموظف مبارك و هو يعلم أن السلاح الذي حصل علي عمولة منه عندما أشتراه يستخدم الأن لقتل أشقاء مسلمين و مسيحين هل هذه هدية مصر لفلسطين أم هدية مصر لإسرائيل بمناسبة العام الجديد



التفاصيل القبيحة تم حجبها بطلب مني

٢٧‏/١٢‏/٢٠٠٦

كلهم أصدقائي All My Friends


مش عارف ليه كتير من أصحابي أضايقوا من البوست اللي فات رغم إن البوست مقصود بيه ناس بعينهم و خلاص كان بوست في فترة زعل و خلاص و لكن عشان أصحابي اللي زعلوا عزاز عليا أنا قررت أكتبلهم البوست ده يا رب يفهموا إنه ليهم رغم إني هاكتب أسمائهم(:


من ساعة ما أتولدت .... المعتز بالله ....

المعتز بالله :

طبعاً المعتز بالله دي مش المقصود بيها صفها-كلنا معتزين بالله - لكن ده اسم أول صاحب ليا منذ أن وطئترأسي هذا الكوكب العجيب اه و الله معتز كان صاحبي من حضانة و فضلنا أصحاب كما أزعم لغاية دلوقتي أصل الحضانة بتاعتنا كانت في المدرسة و المدرسة كانت من حضانة لثانوي ففضلنا مع بعض لغاية ما خلصنا الكلية و فضلنا أصحاب بعد كده معتز راجل جدع جداً بيحب أصحابه مهما كانوا بعاد عنه يمكن هو أكثر أصدقائي تضرراً مني بس و الله يا معتز غصب عني مش عارف هي ليه دايما تيجي فيك سامحني يا صديقي العزيز و أخي الأول.

أوائل الألفية الجديدة ...شادي و محمد و هشام ....

ثلاثة من أصدقائي الأعزاء جداً كنا مع بعض في المدرسة برضه بس ما كناش أصحاب قوي



شادي:

كان بيقعد جنبي في الديسك في الشهر اللي بيجيه مصر أصله كان مسافرالسعودية مع أهله و كان بيجي شهر واحد كان أكثر أصدقائي أدباً و طفولية بسبب تربيته المحافظة خاصة انه عاش معظم حياته خارج مصر و كان يتحاشي الصدام مع أي شخص طبعاً الوضع أتغير دلوقتي للعكس ..لا شادي لسه صاحبي بس الهدوء قلب جنان و الأدب قلب **** بس و الله راجل طيب و محترم و جدع قوي و من ساعة ما خلصنا مدرسة بقينا صحاب قوي .


محمد مصطفي :

صديقي الملظلظ اللذيذ اللي يقدر يخليك تضحك و أنت في أسوأ حالاتك فكاهي بالفطرة بس ساعات بيقلب عبيط بس راجل جداً من النوبة يعني ابن بلد و بيحب مصر قوي و دايما يأخد آراء غير آرائي طول ما معانا ناس و لما نكون مع بعض بنتمشي ولا حاجة تلاقيه موافقي الرأي أنا و محمد ناقر و نقير بس أنا بحبه بجد و عارف أنه بيحبني و عارف أنه جواه حاجات كتير قوي لسا ما طلعاش يارب تطلع بقي عشان نخلص يمكن محمد في يوم من الأيام يبقي حاجة مهمة أدعو معايا.


هشام محمد :

يمكن أنا و هشام ماكناش أصحاب بدرجة كافية أيام المدرسة تؤهلنا إننا نبقي أصحاب بعد ما المدرسة تخلص بس ده اللي حصل بقينا أصحاب بجد و أخوات كمان هشام راجل تقدر تعتمد عليه واحد جان و جامد بس معندوش ثقة بنفسه و دي حاجة غير مبررة بالمرة ,حلم أمريكا لسه مسيطر علي هشام عشان سافر هناك أربع سنين مع باباه بصراحة عنده حق أنا شايف إنه قدها و قدود أستعدي يا أمريكا هشام جايلك .


شهر سبتمبر عام2005

بداية رحلتي في الدستور و بداية تعرفي علي أصدقاء أكاد أجزم إني عارفهم من سنين كتير قوي أكتر من الشهور اللي التاريخ مسجلهالنا.

أحمد الدريني:

صديقي العزيز الرفيع الضليع بقواعد اللغتي العربية و اللي بجد ما قابلتش حد شبهه قبل كده أتعجب من طريقة تعامله مع الناس و أتعلم منه الكثير تقابلنا أولاً في الدستور و شاء القدر و أعتبرها ليست مصادفة أن يكون أول موضوع ليا في الدستور بجوار موضوع للدريني أصبحنا أصدقاء بدون سابق إنذار مش عارف و لا هو عارف بقينا أصحاب إزاي بس من ساعة ما بقينا أصحاب و أنا مش مستعد أخسره و أظنه كذلك ممكن ألخصلوكوا الدريني بكلمة واحدة الدريني رجل روحاني و أفهموها زي ما تفهموها هو ده صديقي العزيز و الذي أستطيع أن أقول له أني أعرف ما يخبئه القدر لنا "كل خير يا صديقي " و علي ضمنتي.



طالما حلمت بإنضمام واحدة أخري للبنتين دول حتي أطلق عليهم لقب الثري ويتشيز بتوع ماكبث لكن دلوقتي أقدر أقول إنهم التو ويتشيز .


دعاء عادل:

أتذكر بشدة كيف تقابلنا كنت قد توكلت علي الله و ركبت 105 من قدام البيت عشان أروح الإسعاف أركب للدستور و إذا بي أشوف دعاء واقفه في رمسيس قلت يا واد طنش خالص بس لاقيتها شافتني قلت عيب برضه أسيبها و أمشي قمت نازل من الأتوبيس و قلت أركب معاها يومها دعاء لفيفتني مصر كلها في جولة بعدة أتوبيسات من هيئة النقل العام ثم تمشيه لا بأس بها من الدقي تقريباً للعجوزة دي كانت بداية صحبيتي مع دعاء و اللي بأعتبرها أخت مجنونة لا مثيل لها أبداً ربنا يزود جنانك يا دعاء عشان تعقلي بقي.

حنان الجوهري:

لو نفسك تشوف بنت أموره بس راجل يبقي مفيش غير حنان بجد البنت دي بتفكرني ببنات البلد اللي عمري ما شفتهم بنت جدعة و بنت نكتة و محترمة و صاحبته صاحبها , مش فاكر برضه بقينا أصحاب إزاي بس طبعاً فاكر قعديتنا أنا و هي و دريني و دعاء في كل حته في الجرنان لما كنا بنكتب لكساب أو علي البورصة بعد الدستور أو عند أبو عامر بنضرب سندوتشات ملوثة بجد حنان خسارة في أي راجل في الدنيا بس يا رب تتجوز و خلاص عشان عندها شوية جنان عاوزين يتظبطوا شوية.


لعلي لم أقابل رؤساء قبل ذلك أو قابلتهم و لكنهم لم يكونوا كذلك:



خالد البلشي:

أقولك إيه و أحكيلك إيه خالد البلشي الراجل ده راجل بجد الراجل هو اللي عمل من العبد لله اللي ما كنش بيقرأ غير الجمهورية و كتب المدرسة صحفي أو هكذا يقولوا , لم أتعرض لمثل هذا الموقف من قبل أن أقابل رئيس يمكن أن يكون صديقي الحقيقي الذي أحكي له عن متاعب العمل و البيت و الحبيبة التي أنهكني البحث عنها -حتي وجدتها- صديق و أخ و أب و رئيس و فوق ذلك راجل يفهمك قبل أول مرة تتقابله فيها , أتذكر جيدأ ذلك اليوم الذي أراه يوم أسود في حياتي رغم قلة الأحداث فيه كانت عجيبة لا أدري لها معني صوتي العالي لا يلبث أن يخفت حتي يرتفع ثم جاء خالد و أخذني من يدي و أغلق باب المكتب علينا و قام بدور فرويد علي أكمل ما يكون و حلل لي كل المشاكل التي أعانيها و خيرني بين الفوقان أو حبة بتاع كده مش فاكر اسمه عشان أعصابي تهدأ , خالد العظيم لا نعمل سوياً الأن بالشكل الكافي لكنك ما زلات صديقي العزيز و رئيسي الوحيد .


لا تحتاج لفترة زمنية طويلة لتتأكد أن ما يقف أمامك هو صديق حقيقي ربما لن تجد مثله بعد اليوم أو قبل كده.


البراء أشرف:


البداية كانت علي أسوأ ما يكون لم أعجب بشخصية براء التي ظننتها متعالية رغم إثنائه علي كل الأفكار التي أتيت بها له في موقع عشرينات حيث يرقد ولاد البلد الأن براء الثقيل الوزن الخفيف الدم و الثقيل قوي في الدماغ يمكن أ، يحيل التراب المعجون بزفت لذهب أبيض إماراتي بكلامه , براء أعتبره صديق عزيز و أتعجب لتعجبه عندما وجدني و دريني و ندا في يوم فرحه نركض وراءه حتي بعد أخر الدنيا بمحطتين - كفر الشيخ- الحقيقة يا صديق أنك صديقي بالفعل و كان هذا مجرد واجب بسيط جدا لا نستحق عليه كل ثنائك الجميل أو تعجبك المدارا عن الجميع براء بحبك يا بيرو.

مصعب الخير:


اسمه الحقيقي مصعب أحمد لكن مصعب الخير أكثر واقعية و تعبيرا عن ذلك الشخص الذي صدمت برؤيته كبراء تماما ظننته ذلك الشخص الأخواني الذي يظهر في أفام عادل إمام ليبث ممنوعاته علي الجميع لا تدخن لا تقل و حياة ربنا لا لا لا..

معلش يا مصعب الغلطة مش غلطتي و الله دي غلطن عادل إمام بس بعدها أكتشفت أني أمام شخص شفاف بدرجة غير عادية يحب الخير بجد و لا أظن أ، مصعب الخير تكفي له فأراه شخص عبقري يحتاج الكثير من التقدير الذي لم تعطيه إياه هذه البلد بنت ال*********

مصعب أنا أظن أنك أكثر من صديق بجد أ،ا عارف إنك عارف إني بأحبك بجد يا مصعب لأنك راجل محترم و عبقري و تستأهل كل خير يا مصعب الخير.


لم أتركك في نهاية البوست عشان أنت أخر واحدة عرفتها بس أنا سايبك للأخر عشان مينفعش أقول كلام لأي حد بعد ما أتكلم عنك يا حبيبتي.

أميرة حسن:

تلك الملاك الذي يرتدي وجة الرجل في تصرفاته حتي لا يعلم العالم بملائكيتها فيلهثو ورائها أميرة استطعت الوصول لقلبك الأبيض و لعقلك العبقري الذي أثبت لي أن الأصل في المراة ليس السذاجة كما كنت أقول و لكن هناك منهن من قدرت أن تفوق الجميع في ذكائها , أميرة بجد أنا مش عارف أقول إيه ,حنيتك اللي عمري ما شوفت زيها و خوفك عليا أنا عمري ما قابلت حد حنين بالطريقة دي رغم إني عارف إنه بجد محتاج للحنية دي بالرغم من كده مش بيستخر يديها للي محتاجها , أوعدك إني أعوضك عن الحنية اللي فاتتك أو اللي كان المفروض تشوفيها مني في وقت ما كناش لسه لبعض , حبيبتي عارفه إني بقيت ملك حتي لو كنت قدامك باعافر إني ما أبينش إني خلاص مش قادر أبعد عنك لو لحظة بجد يا حبيبتي أنا خلاص بأرفع الراية البيضاء اللي مرسوم عليها قلبي أنا خلاص مش قادر أبعد عنك و لو لحظة صدقيني أنت أجمل من إنك تكوني ليا بس أرحمي قلبي اللي مش قادر يعيش من غيرك و أفضلي معاه بجد أنا محتاجك قوي .


أصدقائي الأعزاء بحبكم كلكم و بجد أنا حياتي من غيركم لا تحمل أي معني أبقوا بجواري رغم حماقاتي فلا تنسوا أني ما زلت أحمل لقب بشر و كل سنة و أنتو طيبين

معرفتش أحط صوركم كلكم فأكتفيت أني أحط صورتي(:

١٩‏/١٢‏/٢٠٠٦

الرهان الخاسر




لا تراهن إلا علي نفسك مش بس عشان الرهان حرام لكن لأن أي رهان آخر هو رهان خاسر , لا تراهن علي صديق أو قريب أو بعيد ,لا تراهن علي ردود أفعال أي شخص مهما كنت واثق فيه ,عارف ليه عشان أكيد هتخسر ,لا يوجد اي مكسب من الرهان علي أي شخص لأنه مفيش مكسب, حتي لو أصبت الرهان فأنت لن تربح أي شيء سوء أنك راهنت علي شخص و نجح, هل تري أي مكسب في هذا الرهان؟.

في الفترة الأخيرة راهنت كثيراً, راهنت أن صديقي سيبقي صديقي مهما حدث و كانت النتيجة الخسارة الحتمية لأن كل شخص له حساباته الخاصة التي قد لا تتوافق مع حساباتك ,و النتيجة أنك تخسر , قد يكون صديقك صديق فعلي و يحبك حب حقيقي و لكن قد تراهن عليه في موقف ما و تجد ان هذا الشخص أختلفت حساباته عن حساباتك و بالتالي أنت الخاسر , راهنت في الفترة الماضية علي رؤساء كنت قد تصورت أن العمل معهم و الوثوق فيهم أمر بديهي فراهنت علي مواقفهم و خسرت الرهان ليس لأنهم تخلوا عن شيء ما و لكن لأن حساباتهم أختلفت عن حساباتي و كانت النتيجة الحتمية الخسارة و أكتشفت أني إذا راهنت علي أي شخص فأنا الخاسر الوحيد و لو كنت مغرم بالرهان فعليك بنفسك فقط فذلك هو الرهان الوحيد الفائز حتي لو خسرت هذا الرهان فقد أكتسبت خبرة في الخسارة و تعلمت أخطائك أما أن تراهن علي أي شخص مهما كانت درجة وثوقك به فالنتيجة حتمية عاجلة أو أجلة الخسارة شيء مؤكد أكثر من بقاء الريس علي الحكم حتي الموت , لا أدعو الناس لعدم الوثوق في أصدقائهم و لكن أدعوهم لعدم المراهنة علي أي شخص لأن مهما كانت قرب هذه الشخصية منك و من صفاتك فإن الله قد وضع أختلافت بينكم و أعتقد أن الطريقة الوحيدة للحفاظ علي الأصدقاء هو عدم المراهنة عليهم أو علي مواقفهم , عندما تريد أتخاذ موقف ما لا تنظر إلي ردود أفعال الناس و لا تراهن علي ردود أفعالهم أو مواقفهم فالرهن يا صديقي خاسر خاسر و الله أعلم

١٢‏/١٢‏/٢٠٠٦

مصر تساعد البرنامج النووي الإسرائيلي أدعوا للريس بالصحةوالعافية




الحمد لله يا شعب مصر الغاز المصري وصل إسرائيل بالسلامة و كمان الشيكلات اليهودي وصلت مصر علي هيئة دولارات بعد ما رجل الاعمال اليهودي دوراد أشتري 35 مليار متر مكعب من الغاز الطبيعي المصري بملياري دولار - مش عارف بصراحة كام شيكل - لكن خلاص تمت الصفقة بين الراجل اليهودي وشركة إيه أم جي المصرية لشراء 35 مليار متر مكعب من الغاز الطبيعي المصري للمساعدة في بناء مركز طاقة نووية في أشكيلون ياله مبروك علينا القرشينات و مبروك عليهم الغاز و الطاقة النووية


( دي واحدة إسرائيلية بتولع البوتاجاز بتاعها بالغاز!)

٠٢‏/١٢‏/٢٠٠٦

خطأ عبد الناصر الغير مقصود



DEFE 4/82 COS(56)" " ليست تلك هي كلمة السر لموقع الCIA علي النت و لكنه كود أحد ملفات الأرشيف الوطني الإنجليزي و الذي كتبه المارشال الجوي "ديرموت بويل" عن أحداث 26 يناير 1956 طبعاً التاريخ ده لا يمثل أي أهمية للشعب المصري و لكن لو عرفت إنه في ذلك التاريخ كانت القوات الإنجليزية تستعد لضرب إسرائيل بدلاً من مصر زي ما حصل في الواقع أظن التقرير سيصبح ذو أهمية , التقرير نشرته جريدة الجارديان الإنجليزية بمناسبة مرور 50 عام علي تأميم قناة السويس و كتب التقرير الصحفي الكبير "كيس كيلي" و هذا ما جاء في التقرير.
26 يناير 1956 في "وايت هيل " كانت الأمور تسيير بشكل جيد جدا,ً الإستعداد للحرب علي أشدة بقيادة الجنرالات الإنجليز , كل شئ أصبح جاهز لعملية الحبال أو " " Operation Cordage كما أسماها الإنجليز, الظروف رائعة , العلاقات مع الأمريكان سيئة جداً و أصبح من الواضح أن الشرق الأوسط هو الملعب الجديد , و المفترض أن يثبت الإنجليز أنهم مازالوا موجودين لذلك كانت العملية التي خططوا لها لضرب إسرائيل .. نعم إسرائيل فالإنجليز أستعدوا لضرب إسرائيل ثم صُدموا عندما وجدوا جمال عبد الناصر يضرب كل مخططاتهم بتأميم قناة السويس لتقوم نفس القوات المرابطة عند ساحل قبرص بضرب مصر بدلاً من إسرائيل بل و الإستعانة بإسرائيل بقيادة أرييل شارون ليضرب سيناء , خطة الإنجليز لضرب إسرائيل صادمة للغاية إذا علمت أنها كانت تقريبا نفس الخطة التي أستخدمها الإسرائيليين لضرب سيناء في 1967 , الإنجليز كانوا سيضربون المطارات الإسرائيلية أولاً ثم الطائرات الإسرائيلية العاجزة بعد ذلك ليقضوا عليها و يسحقوها تماماً مثلما حدث مع مصر في 67 و كانت القوات الإنجليزية في قبرص ستقوم بتنفيذ هذه العملية , و الخطوة الثانية في خطة الإنجليز كانت إحتلال ميناء إيلات و هي المدينة التي أستبدلت لتصبح سيناء فيما بعد , وكانت قوات الصاعقة الإنجليزية ستقوم بإحتلال الميناء لتمنع عن إسرائيل أي مساعدات بحرية لتعزلها بعد ذلك عن العالم لتصبح في قبضة الإنجليز بسهولة, و لكن عندما قام جمال عبد الناصر بتأميم شركة قناة السويس كشركة مصرية تم تغير عملية الحبال لتصبح عملية الفارس أو " Operation Musketeer" ليتم بعدها الإستعانة بالفرنسيين المتضريين كذلك من تأميم القناة و الإستعانة بقوات أرييل شارون التي كانت تستعد في الوقت نفسه لضرب الأردن بدلاً من سيناء عندما جاءتها الأوامر من قيادتها بتغير الإتجاه و ترك الأردن نهائياً لضرب سيناء بنفس الطريقة التي كانت ستضرب بها الأردن.
و يبدأ العدوان الثلاثي علي مصر بضرب مدن القنال الثلاثة بورسعيد و السويس و الإسماعيلية إلي جانب سيناء التي دخلتها قوات شارون , و تصمد المقاومة الشعبية , و يتدخل قطبي العالم السوفيت و الأمريكان لتخرج القوات الثلاثية و تبقي الإمبراطورية الإنجليزية و القوة الفرنسية خارج نطاق الخدمة و الباقي أنتو عارفينه .
أقرأ تقرير الجارديان لو ليك في الإنجليزي
http://www.guardian.co.uk/comment/story/0,,1818971,00.html

٢٧‏/١١‏/٢٠٠٦


أنت وحشاااااااااااااااني قوي يا أميرتي بجد أنا مش عارف أنا جاي أقولك كده ليه دلوقتي بالرغم إني قلتهالك كتير بس بجد أنت وحشاني قوي يا حبيبتي يمكن أنا حاسس إني لازم أقولهالك بصوت عالي عشان كل الناس تسمعها و بما إني مش عارف أقولهالك قدام الناس بصوت عالي فأنا هأقولهالك هنا
أنا بحبك قوي و أنت وحشااااااااااني قوي قوي قوي لغاية بكره الصبح كان نفسي أبقي جنبك علي طول عشان أنا عارف إن ده بيفرحك زي ما بيفرحني بالظبط حبيبتي أكيد هيجي اليوم اللي هنكون فيه مع بعض و أوعدك بعدها مش هأسيبك تبعدي عني و لا لحظة حتي و أنت نايمة هأجبرك تشوفيني في الحلم بالرغم إني عارف إنك بتفكري فيا علي طول مش عشان أ،ت بتقوليلي كده بس عشان أنا بحس بيكي قوي يا حبيبتي و أنت عارفه ده كويس قوي أميرتي و حبيبتي و أحلي حاجة في دنيتي أنا بحبك قوي و مش عاوزك تبقي زعلانة مني أبداً ,أنا عارف إني مقصر قوي في حقك بس و الله يا حبيبتي غصب عني أنت عارفه إني هأموت و أفضل جنبك سمحيني بجد يا حبيبتي لو كنت في يوم زعلتك و تأكدي إن ده كان غصب عني و إ،ي لو زعلتك بأكون زعلت نفسي ألف مرة بعديها
بحبك

٢٢‏/١١‏/٢٠٠٦

أنا بأكره إسرائيل يا أمريكا


إيه رأيكم في معاهدة السلام بين مصر و إسرائيل ؟ بصراحة أنا عارف رأيكم كويس قوي , من كام يوم كان فيه نتيجة مش عارف مركز إيه تبع الحكومة نزلها بتقول إن المصريين بيكرهوا إسرائيل بنسبة98% و بيعتبروها عدو ليهم و 60% من المصريين بيعتبروا الدنمارك عدوهم , النتيجة دي بالنسبة لينا عادية جداً و يمكن نعمل حملة عشان ندور علي ال2% المطبعين و لو أن أنا عارفهم كويس- أقولكم و ماتقولوش لحد لا مش هأقولكم- .
النتيجة دي واضح إنها عملت قلبان جامد بره مش عشان مصر لا سمح الله ليها تأثير بره لكن عشان إسرائيل هي اللي ليها تأثير الجرايد الأمريكية و علي رأسهم The newyork sun طالبت إسرائيل و أمريكا بمراجعه إتفاقية السلام بين مصر و إسرائيل و إعادة تقيمها لأن في رأيهم إن مصر ضحكت عليهم و استفادت من الإتفاقية من غير ما يحصل تطبيع – هما ما يعرفوش موضوع الكويز و لا إيه!!- و بدءت الجرايد تشرح مصر و خاصة الجانب العسكري لمصر و إزاي مصر استفادت من إتفاقية السلام في إنها تحصل علي أحدث الأسلحة الأمريكية بالرغم إن اللي مصر بتأخده واقعياً هي أسلحة أقل تطوراً أو مساوية للأسلحة اللي أداهلنا الروس أيام السادات هتسألوني و أنت تعرف منين يا فالح أقولكم يا ناصحين السنة اللي فاتت مصر أشترت بما يساوي 295 مليون دولار أمريكي صواريخ باتريوت مضادة للصواريخ -دفاعية- مين أعترض بقي؟؟ إسرائيل طبعاً فظهر تقرير إسرائيلي يؤكد أن الأسلحة اللي مصر خاديتها هي بالظبط زي الأسلحة اللي خادتها مصر من الأتحاد السوفيتي البائد و إن مصر اشتريتها من أمريكا عشان الاتحاد السوفيتي اللي زي ما قولتلكم بقي بائد بطل يصنعلها قطع غيار و بالتالي مصر قررت تشتري أسلحة بضمان راية قصدي بضمان أمريكا عشان لو العدة جرالها حاجة توديها التوكيل في بوسطن , و مع ذلك الكلام اللي حضرتكم قرتوه الصحافة و المحللين الأمريكان مصممين علي إعادة تقيم الإتفاقية لأنهم شايفين إن مصر بتبعزق فلوس علس السلاح كتير قوي و بتستفيد من علاقتها بأمريكا طبقاً لتقرير للكونجرس الأمريكي إن مصر صرفت في الفترة من 2001 حتي 2004 كانت 6.5 مليار دولار يعني بالمصري كده حوالي 36 مليار جنية مصري و ده خلاها في المرتبة الأولي عربياً و شرق أوسطياً يعني قبل كل الدول العربية و قبل إسرائيل اللي صرفت في نفس الفترة 4,8 مليار دولار و جاءت في المركز الثالث بعد السعودية اللي صرفت في نفس الفترة 5,6 مليار دولار يعني مصر صرفت أكتر من أغني دولة عربية و أكتر من الدولة اللي عايشه حالة حرب من 1948 يعني من يوم مولدها السرطاني في وسط الوطن العربي,مش بس كده ده كمان الجيش المصري من الجيوش الأعلي استعداداً بين جيوش الدول النامية و ترتيبه التالت بعد الصين و الهند طبقاً لتقرير Glance , المهم يا معلمين المحللين الأمريكانم شايفيين إن ده كتير علي مصر و إن أمريكا و إسرائيل لازم يراجعوا إتفاقية السلام مع مصر لأن مصر مش كويسة و مش حاسه النعمة اللي هي فيها أنا عاوز رأيكم في الموضوع ده يا تري نكمل الإتفاقية مع إسرائيل و أمريكا مع كل الإغراءات و التسهيلات الأمريكية اللي واخدينها بسب الإتفاقية و لا نلغيها ؟؟؟؟؟
عشان محدش يقول عليا بأهزي أو بأسرب أخبار الجيش المصري هي دي مصادر معلوماتي كاملاً
الجرايد اللي أتكلمت في الموضوع

١٩‏/١١‏/٢٠٠٦

يالاااااااااااااااااااااااااااااااااااااااااااااااااااااااهوي



قالها حسني و خلاص يا شعب مصر الراجل قاعد قاعد مش سايبكم و لا هيتنازل عنكم حتي يأتي أمر الله
و لغاية ما يأتي فالرئيس مستمر لا تقولي إنتخابات و لا تعددية و لا بتنجانية خلاص يا مصر المرة دي الراجل قالها بالفم
المليان أنا مش ماشي من علي كرسي البلد دي غير لما أموت
...سأواصل معكم مسيرة العبور الى المستقبل .. متحملا المسئولية وأمانتها .. ما دام فى الصدر قلب ينبض ونفس
يتردد .. لا أهتز ولا أتزعزع.....
يالاااااااااااااااااااااااااااااااااااااااااااااااااااااااهوي عليكي يا مصر

١٨‏/١١‏/٢٠٠٦

كيف سيعرف الشعب المصري بوفاة الرئيس؟؟؟


أنا مش عارف أنتو رأيكم إيه بس أنا رأيي المتواضع إننا هنعرف
By SMSطبعااااااااااااااا
يا ريت تتدخلوا علي التعليقات و تقولوا رأيكم إزاي الشعب المصري هيعرف ؟؟؟؟؟

١٤‏/١١‏/٢٠٠٦

عمرو دياب راجع يا رجاله


أخيرا قرر عمرو دياب إصدار ألبومه الجديد تحت اسم مبديء هو خليك معايا
و هي أغنية من كلمات ايمن بهجت قمر والحان محمد يحيي
و سيتم طرح الألبوم 31-12-2006
و عمرو أتعاون في الشريط ده مع المؤلفين : مجدى النجار / بهاء الدين محمد / ايمن بهجت قمر/ خالد امين
والملحنين: عمرو مصطفى /محمد يحيي / محمد رحيم / البدرى كلباش /عمرو طنطاوى / عمرودياب

و تقريبا قام الموزع فهد بتوزيع الشريط كاملاً

عمرودياب لحن اغنيتين : ضحكت + قالتلى قول ومن كلمات بهاء الدين محمد
Stay tuned

١٢‏/١١‏/٢٠٠٦

شطة ولمون (2).. إثم شرطة..






هذه التدوينة العظيمة من مدونة البراء أشرف و أنا مالي 

هذه ليست محاولات للسخرية من الحادث.. فقط هي محاولة للسخرية من نفسي.. ومنكم جميعا.. شر البلية ما يضحك.. اضحك من فضلك لتدرك أنه.. شر!!

* التحرش بالصحفيات.. التحرش ببنات وسط البلد.. التحرش بالمتظاهرين.. التحرش بالمتهمين في أقسام الشرطة.. كلها أحداث وقعت في 2005 و 2006.. يبدو والله أعلم إن هذا هو .. موسم التكاثر عند المصريين..

* الشائعة التي سمعتها أكثر من مرة بعد الفيديو الأخير.. هي أن بعض الشركات الخاصة تدرس تصنيع "واقي ذكري" بيتركب من ورا..

* مطرب شاذ يسجل حاليا أغنية جديدة اسمها "هات العصاية.. وأقعد لاعبني"..

* أحزاب المعارضة قررت تقديم مشروع قانون لمجلس الشعب يجرم كل من يضبط بحوزته عصاية مقشة..

* وزارة الأوقاف "أمن الدولة سابقا".. تدرس تجريم حيازة الموبايل أبو كاميرا خصوصا لظباط الشرطة..

* سواق ميكروباص كتب على خلفية سيارته الجملة التالية : " يا ناس يا بط كفاية عط".. السواق تم احتجازه لمدة 15 يوم بعد أن شعر أمين الشرطة المسؤل عن الموقف أن السواق يقصده بكلمة "عط"..

* أصبح أمر طبيعي أن نجد ظابط منحرف يقوم بالتحرش داخل حمامات السيدات في المولات والسينمات.. الظاهرة الجديدة أن الظابط المذكور تم ضبطه أكتر من مرة.. يتحرش أيضا.. لكن في حمام.. الرجالة!!

* سين سؤال : إيه العلاقة بين ظابط الشرطة وبين سواق العربية النص نقل؟؟

جيم جواب : الإتنين مسموح لهم باستخدام بروز وأطوال!!

* على حجر "حاتم رشيد" تم العلماء أخيرا من الكشف عن كلمة فرعونية قديمة هي الكلمة الأصلية لاسم السجن الأمريكي الشهير جوانتنامو.. الكلمة الفرعونية اسمها (جوه.. أنت.. نامو) ويدرس زاهي حواس مقاضاة الإدارة الأمريكية لإثبات أن اسم السجن مصري قديم..

* في اختبارات كلية الشرطة يتم طرح السؤال التالي:

كيف تستطيع تعذيب أربع متهمين دفعة واحدة.. ؟؟ الإجابة النموذجية على السؤال تكون كالتالي..

- عن طريق الكرسي المقلوب يا فندم..

* وزارة الأوقاف المصرية تعلن مسؤليتها عن الفيديو الذي تم تسريبه للمدونات والمواقع على الإنترنت.. بيان وزارة الأوقاف يقول إن الفيديو ليس فيه تعذيب ولا حاجة.. ده بس ميكينج للإعلان الجديد اللي بتنفذه الوزارة عن.. جهنم!

* حركة معارضة جديدة اسمها "إسهال من أجل التغيير".. الحركة تقوم على فكرة توزيع حبوب تتسبب في الإسهال للمواطنين.. بحيث لو راحو إثم الشرطة وحد حاول معاهم بطريقة المقشة يقرف وينجو المواطن..

* وزارة الداخلية تدرس تغيير شعارها من "الشرطة في خدمة الشعب" إلى.. "في البدء كانت العصاية".. على أن يتم توزيع إعلانات دورية في الشارع مكتوب فيها "العصا لمن عصى"..

* منظمة الصحة العالمية تحذر من استخدام عصايتين في الوقت نفسه في تعذيب المتهم.. ووزارة الداخلية تقول أنها تستخدم عصاية واحدة للمواطن.. ويتم اعدام العصاية المستخدمة واستخدام واحدة جديدة مع كل مواطن جديد.. منعا للعدوى..

* وزارة الداخلية تدرس نقل مقرها إلى برج القاهرة.. ومحافظ القاهرة يعلن عن مشروع جديد لإقامة نصب تذكاري للعصاية المجهولة..

* sms انتشرت مؤخرا تقول أن حركة كفاية ستغير اسمها ليصبح حركة "عصاية"..

* أخبار الحوادث : وفاة مواطن في حادثة عصاية.. المخبر نسى ووضع العصاية من ناحية المقشة دون أن ينزع المقشة نفسها..

وزير الخارجة : الحادث قضاء وقدر..

الطب الشرعي : الإهمال وراء الحادث

ممتاز القط : أقترح أن يتم وضع علامات سالب وموجب على العصيان مثل الموجودة على البطاريات.. حتى يفهم المخبر من أي جهة توضع المقشة

* أخبار الحوادث (باب الغرائب والطرائف) : بعد 16 سنة من خروجه من القسم في تحقيق في قضية نشل.. استخراج ممسحة من مؤخرة تاجر مخدرات كان نشالا وهو صغير.. المؤخرة ابتلعت الممسحة ولم يشعر بها المتهم طوال 16 سنة.. واكتشفها المخبر وهو يحقق معاه بعصاية جديدة..

* أخبار الطب : نجاح جراحة عاجلة.. العصاية علقت في مؤخرة المواطن بعد أن فشل الظابط في استخدامها..

رئيس الفريق المعالج : الظابط استخدم عصاية بمقاس أكبر من مقاس المؤخرة. .

* الدستور : الصين تورد لمصر 10 مليون عصاية.. ابن مسؤل كبير وراء صفقة العصيان المشبوهة..

مقال ابراهيم عيسى : صمت العصيان

* وزارة الداخلية تمنع تماما بيع أو استخدام "اللبوس".. دراسات علمية وراء قرار المنع تفيد أن اللبوس يتسبب في ميول إجرامية لدى الأطفال..

* مصر ترفض توقيع اتفاقية دولية تحضر العصيان.. مصدر دبلوماسي : مصر لن توقع على اتفاقية حظر العصيان مهما حدث.. ولن نسمح بدخول مفتشين من هيئة العصيان الدولية..

* عصيان المدني : هو أن يبدأ الشعب نفسه في استخدام العصاية بعد أن كان استخدامها مقصورا على ظباط الشرطة.

* محلل سياسي معارض : النظام الحالي استمد شرعيته من العصاية

* أخبار الأدب : رواية جديدة بالأسواق.. قصة عصايتين

- التدوينة كتبت على قهوة البورصة بالتعاون مع : مصعب وفؤاد

- الصورة من تصميم "أحمد القطب"

 

١١‏/١١‏/٢٠٠٦

To V or not to V


v said:

Viola! In view a humble vaudevillian veteran,
cast vicariously as both victim and villain
by the vicissitudes of fate.
This visage, no mere veneer of vanity,
is it vestige of the vox populi, now vacant, vanished
.However, this valorous visitation of a by-gone vexation
, stands vivified, and has vowed to vanquish these venal
and virulent vermin vanguarding vice
and vouchsafing the violently vicious and
voracious violation of volition.
The only verdict is vengeance; a vendetta,
held as a votive, not in vain, for the value
and veracity of such shall one day vindicate
the vigilant and the virtuous.
Verily, this vichyssoise of verbiage veers
most verbose, so let me simply add that
it's my very good honor to meet you
and you may call me V.




٠٧‏/١١‏/٢٠٠٦

النهاردة فرحه يا جدعان





هيه براء أتجوز .. يا جدعان الفرح كان في كفر الشيخ و كان فرح جااااااااامد و بعد مجهود مضني خلينا براء يرقص و الباقي ممكن تشوفوه في الصور
شارك بإيجابية



٠٣‏/١١‏/٢٠٠٦

شخابيط الصباح و المساء


ا خرجت مظاهرات تجتاج أنحاء القاهرة وصفت بأنها إنتفاضة للحرامية بعد وصول سعر كيلو الطماطم إلي 4 جنية و البصل إلي 4 جنية برضه و الفاصوليا 7 جنية فيما واصلت الدولة إغراق الأسواق بثمار الكوسة الطازجة.(خبر كاذب)
ب علي طريقة فايدة كامل الساحرة البرلمانية الشريرة -سابقاً- ذهب الرئيس مبارك و شد الرحال و أعد العدة ليطلب من الرئيس الروسي بوتين تغير المادة المتعلقة بفترات الولاية الرئاسية في الدستور الروسي عشان بوتين يقدر يكمل كرئيس لروسيا لأن روسيا محتاجاه , الظاهر إن الرئيس مبارك عجبه موضوع كفاية فقرر إن يحاول نشره في كل البلدان الصديقة ,يا عم الحج الرئيس أرحم الشعب الروسي مهياش ناقصاك.
ت استطاعت حكومتنا المباركة التعامل بحزم و قوة مع أحداث التحرش الأخيرة عندما قالت أنها تعتزم إغلاق محلات الخمور و مصانع المعسل في وسط البلد إلي جانب نشاطها المستمر في إغلاق مقاهي و كافتيريات وسط البلد , و قالت رداً علي أحد الأسئلة إنها بتحاول منع الرجالة من الخروج من البيوت ليلاً.

العيد العاشر للجزيرة و نظرية المؤامرة


العيد العاشر للجزيرة و نظرية المؤامرة
ربما ما أذكره في هذه التدوينة قد يترتب عليه تصنيفي إلي متبع لنظرية المؤامرة و مؤمن بها أو إلي مطبع مع العدو الصهيوني أو وهابي أو يمكن إنجليزي متعصب ضد أيرلندا الشمالية , بس كل اللي أنا كاتبه مجرد كلام و إستنتاجات أعتبرها منطقية عند التفكير في أي موضوع من كل الزوايا الممكنة كما ستروا في هذه التدوينة و سأبدأ بعرض بعض الملاحظات و بعد ذلك أترك لكم الإستنتاج مع قليل من المساعدة للوصول لما وصلت إليه:
قناة البي بي سي العربية قامت بتدريب عدد كبير من الكوادر العربية و الذين من دونها ما كانوا ليصلوا لما وصلوا إليه الآن,ثم أغلقت القناة دون أن تستفيد ممن دربتهم بسبب إذاعة تقارير عن معارض سعودي كان تقريباً لاجيء سياسي ببريطانيا و كانت السعودية تريد نفية لأمريكا اللاتينية و لكن بريطانيا رفضت.
خروج السعودية من صفقة البي بي سي العربية لم يكن ليضر بالبي بي سي بالقدر الكبير لأنه كما ترون الأن فإن البي بي سي العربية في طريقها للإنطلاق فلماذا الخروج في هذا التوقيت و لماذا هذا التقرير في نفس التوقيت.
قطر ما كان لها أن تظهر صورتها أو يعلو صوتها إلا بعد تعميقها للعلاقات مع إسرائيل -كل الدول العربية علي علاقة بإسرائيل- بعد ظهور الجزيرة ,قامت إسرائيل بمساعدة قطر ب10 ملاين دولارات كمساعدة منها لبناء الأكاديمية الرياضية القطرية الجديدة و استطاعت إسرائيل دعوة بيلية و مارادونا لحفل الإفتتاح .
المستفيد الوحيد من حالة إنتشار الخلافات العربية و تعميقها هو بالطبع إسرائيل كما تفعل في أي مناسبة.
لو فكرت قليلاً في هذه النقاط ستصل حتماً إلي إحدي نتيجتين إما إني بأهرتل و كل هذه الإستنتاجات من درب العبث و حرارة شمس القاهرة و سحابتها السوداء أو إن الموضوع به نقاط ما تزال في الظل و لكن يمكن إستناجاها لنصل للنتيجة الموجودة في الصورة أعلي الموضوع , وأشكرك إنك كملت الموضوع لآخره.

٣١‏/١٠‏/٢٠٠٦

حتي السادسة


أتعجب بشدة من فهلوة الشعب المصري في كل حاجة غير قابلة للفهلوة و تصل مراحل التعجب عندي لأعلي مستوياتها عندما أجد الشعب المصري يتعامل بغباء شديد مع البديهيات .
و من الحاجات اللي رفعت مستوي الدهشة عندي عدم ركوب المصرين للعربة الثانية في المترو المكتوب عليها للسيدات حتي السادسة و ينحشر ركاب المترو في باقي عربيات المترو بطريقة غريبة و تبقي هذه العربة شبة رايقة مقارنة بالعربيات الأخري ,
و لكسر الحاجز النفسي لدي من ركوب هذه العربة مادام الناس مش بتركبها جربت إمبارح أركب في عربية السيدات حتي السادسة و كانت الساعة ثمانية و نص تقريباً عشان اصطدم بنظرات من كم من الستات و البنات و كل ما هو أنثي تنظر لي بطريقة لو كان للنظرات مفعول لحولتني إلي خرقة قديمة -علي رأي دريني- و لم أجد أي بني أدم ذكر في العربية ؟
فكرت أركب العربية العادية بس ... باب المترو قفل طبعاً , كل هذا المشهد العبثي كان درس عملي لفهم الطريقة التي يتعامل بها المصرين مع كل حاجة في حياتهم بصراحة كده الشعب المصري إمعة و يتبع أسلوب القطيع في حياته بشكل غريب لذلك أي شيء مختلف يراه حتي لو كان هو الصح يتعامل معاه بمنطق اللي ما نعرفش نبعد عنه أو طبقاً للشعار الإنتخابي للرئيس مبارك "اللي نعرفه أحسن من اللي ما نعرفوش" .
عشان كده الحل مع الشعب ده هو صدمه و صعقه بكل الطرق لغاية ما يفوق عشان يكتشف إن اللي هو متعود عليه هو الغلط و الصح مش لازم يكون ما وجدنا أباءنا لهم عاكفون و هي دي بداية التغير إن كل الرجالة يركبوا عربية السيدات بعد السادسة .

٢٨‏/١٠‏/٢٠٠٦

عنيها حلوة قوي



عمرك قبل كده دخلت سينما و خرجت منها و انت مش فاكر أي حاجة من الفيلم ؟!
أحياناً بيحصل لما الفيلم يكون كتكوت مثلاً أو لو دخلت السينما مع حد بتحبه ,ده اللي حصلي بالظبط أنا دخلت فيلم "لعبة الحب" مع حبيبتي أول يوم العيد و كان بقالي فترة ما شوفتهاش أكتر من 604860 ثانية تقريبا دخلت الفيلم و لاقيت رأسي من نفسها تتحرك ناحية اليسار حيث تجلس أميرتي بجواري و عينك ما تشوف إلا النور و لا كلمة من الفيلم فاكرها مش فاكر غير عنيها لما كانت تأخد بالها إني مش مركز في الفيلم فتبص لي و تضحك و ينتفض جسدي و يهدد قلبي بالقيام بعملية إنتحارية و تفجيري لو فكرت أبص الناحية التانية و يستمر الفيلم و أنا أتابع حركاتها و أنفعالتها و نظرات عنيها لأخرج من السنيما و يسألني صديقي إيه رأيك في الفيلم ؟؟
فأرد "عنيها حلوة قوي"

١٥‏/٠٩‏/٢٠٠٦

أحن للماضي السحيق


Posted by Picasa

١٤‏/٠٨‏/٢٠٠٦


أنا .. تصدق و الله ما عرفتكش

٣٠‏/٠٧‏/٢٠٠٦

اسمي

٠١‏/٠٦‏/٢٠٠٦

أنا


نازلين من السماء
ماسكيين إيد بعض
أنا و أنت يا حبيبتي
نقطتين مطره
بلاش نقع علي الأرض

٠٧‏/٠٥‏/٢٠٠٦

أنت رباعي الأبعاد و لا خماسي الأبعاد!!


الاختراعات والاكتشافات والكتب والافلام والاكل الحلو كل ده بسبب البعد الخامس فى ابتدائى أخدنا ان الدنيا بعدين ( س. ًص) أفلام كارتون يعنى وفى اعدادى اكتشفنا انها ثلاثية الابعاد ( س. ص. ع) وفى ثانوى اتفاجئنا انها أربعة باضافة البعد الزمنى ولكن الحقيقة ان الدنيا خماسية الابعاد.ايه حكاية البعد الخامس ده بقى ؟! .. البعد الخامس يا معلم هو الذى أنقذ دماغ أرشميدس من القطع على سيف عشماوى بتاع الامبراطور الرومانى وهو اللى عمل من نيوتن والتفاحة أشهر من مادة الميكانيكا اللى وضع أساسها نيوتن وأصبح ذكر اسمه شيئا ضروريا فى أى كتاب يحمل لقب علمى , وعشان ما أطولش عليك هو السبب فى كل الاختراعات والاكتشافات والكتب والافلام والاكل الحلو.. من الاخر كل ابداع جاء بسبب البعد الخامس اللى هو النظرة المختلفة للأشياء .. أى حد عبقرى مابقاش عبقرى عشان هو اتولد عبقرى لكنه أصبح عبقرى لما شاف البعد الخامس لاى حاجة فى الدنيا وهو ده طريقك للعبقرية فكتب المدرسة ومن بعدها ملازم الجامعة لاتصنع العبقرية بل على العكس تصنع الغباء والدهولة وتضع على باب أجدعها خيال شمع أحمر حكومى من النوع الروسى اللى يقفل وما يفتحش تانى ,أديسون بتاع المصباح الكهربائى كان بيسقط فى المدرسة بس ده مش سبب عشان تسقط لانه كان عبقرى اكتشف البعد الخامس فى ملف التانجستين وعمل اللمبة يعنى هو المسئول عن النور اللى احنا فيه دلوقتى وعشان تبقى زيه لازم تتجرد من أى حاجة تعيق خيالك أترك لخيالك العنان ماتفكرش زى الناس العادية حتى لاتصبح مثل الملايين من البشر من دخلوا الدنيا وخرجوا منها دون أن يتركوا ما يتذكرهم العالم به .بص للدنيا من الناحية التانية ـ مش ظهرها يافالح ـ اتفرج على الناس فى الشارع ـ مش المزز ـ استلهم من الدنيا عبقريتك لاتترك الامور تمر من أمامك دون أن تفحص وتمحص وتنظر فكل المشاهد أمامك تدعوك لتخرج العبقرية منها ليستمتع الناس بها.ليه الارض كروية؟!طب ليه الوقت ما بيرجعش؟! ليه الناس بتصحى بالنهار وبتنام بالليل ليه مش العكس؟! اتمرد.. أرفض ممكن الناس تكرهك.. كل العظماء كانوا كده ممكن الناس تبعد عنك وهم يعنى كانوا نفعوا مين؟! اسعى دايما للتفرد وخليك متأكد ان الناس اللى كرهتك هترجع تحبك وكل اللى نبذك هيتمنى يتصور معاك ساعتها يا pop ابقى نفض أو وافق أو حتى أرفض واشخط من حقك ما أنت بقيت عبقرى كل ده بسبب البعد الخامس بسبب نظرتك الغريبة والثاقبة للاشياء لو كنت طالب ماترضاش بالقوانين زى ماهى جادل وناقش كل القوانين تقريبا كانت غلط واتصححت ماعدا القوانين الالهية هى القوانين الثابتة.ارفض الحب التقليدى دور على البعد الخامس فى الحب.. دور فى حبك على حاجة جديدة تخليك واحد تانى غير كل اللى حبوا قبلك روميو طلع شجرة لجولييت .. عنتر جاب النوق الحمر لعبلة والناس فضلت فاكراهم أما الناس التانية الرباعية الابعاد فخلاص اتنسوا ومحدش فاكرهم ومحدش هيفتكرهم لانهم ما فكروش فى الدنيا صح .

١٢‏/٠٤‏/٢٠٠٦

DR. Google



ما تستغربش بعد النهارده لو لاقيت واحد قاعد علي النت
و فاتح جوجل عشان يكشف علي نفسه لأن جوجل أصبح أول دكتور غير بشري في تاريخ البشرية بعد الخبر ده
جوجل يساعد الاطباء في تشخيص الامراض
قام فريق من الاطباء الاستراليين باللجوء الى محرك البحث على الانترنت جوجل لتشخيص 25 حالة مرضية نشرتها المجلة الطبية البريطانية.
وتبين في النتيجة ان التشخيص التي تم التوصل اليه بواسطة جوجل كان صحيحا في 15 حالة منها.

وقد نشرت ادارة المجلة نتائج عمل هذا الفريق في موقعها على الانترنت.

ويقول ناشرو المجلة ان محرك البحث جوجل يمكن ان يكون "مفيدا"، لكن الخبراء البريطانيين يقولون ان ذلك لا يغني عن عمل الطبيب.

وجوجل هو اشهر محرك بحث على الانترنت ويمكن بواسطته الوصول الى اكثر من 3 مليار بحث او معلومة طبية.

كما ان اللجوء الى جوجل لاغراض البحث عن معلومات طبية يعتبر من اهم استخدمات جوجل. عوارض نادرة

في الحالات الخمس والعشرين التي نشرتها المجلة الطبية البريطانية قام الفريق الاسترالي الذي يعمل في مستشفى الاميرة الكسندرا في مدينة بريسبن في استراليا بأخذ 3 الى 5 مصطلحات خاصة بكل حالة واستخدموا محرك البحث للتوصل الى تشخيص المرض.

ثم قاموا بتسجيل التشخيص الذي تم التوصل اليه عبر جوجل للحالات الثلاثة الاكثر اهمية واختاروا التشخيص الاقرب والذي يتناسب مع عوارض المرض.

وبعدها قام الاطباء بمقارنة النتائج التي تم التوصل اليها بواسطة جوجل مع التشخيص الوارد في المجلة.

تبين ان جوجل قد اعطى التشخيص الصحيح فى حوالي نصف الحالات .

وقال رئيس الفريق الدكتور تانج ان جوجل قد يفيد في التشخيص في الحالات التي تكون عوارض ومؤشرات المرض مميزة ويمكن استخدامها بسهولة في محرك البحث. مساعدة

وحذر الفريق من اللجوء الى جوجل من قبل الاشخاص العاديين لتشخيص الامراض واضافوا ان البحث يجب ان يتم من قبل الخبراء.

واشار الفريق الى ان من المفيد اللجوء الى محرك البحث جوجل في الحالات النادرة للمساعدة في تشخيص المرض.

لكن عميد الكلية الملكية للطب العام البروفيسور مايور لاكاني اكد ان لا غنى عن الاطباء في عملية تشخيص المرض.

واضاف "ان المعاينة السريرية والخبرة ضرورية دائما من اجل التوصل الى التشخيص السليم ويمكن اللجوء الى جوجل من اجل مساعدة الاطباء والمرضى فقط".

واشار الناطق باسم جمعية المرضى في بريطانيا الى ان "للاطباء معرفة واسعة جدا فيما يتعلق بظروف التشخيص ونشعر بالقلق حيال قيام الاطباء باللجوء الى الانترنت من اجل تشخيص المرض ثم ماذا لو قام المريض باعطاء معلومات غير صحيحة؟".

واضاف الناطق "رغم ان هناك العديد من المواقع الموثوقة على شبكة الانترنت لكن هناك ايضا عدد كبير من المواقع غير الموثوقة "
BBCArabic.com موضوع من
http://news.bbc.co.uk/go/pr/fr/-/hi/arabic/sci_tech/newsid_6135000/6135002.stm


١٢‏/٠٣‏/٢٠٠٦

موقف البنات من الجواز .. ولا موقف أحمد حلمي


اكتشفت على الرغم من قلة خبرتي في الحياة وصغر المدة التي قضيتها فيها مش عارف هاخرج امتى .. أهي مدة والواحد بيخلصها .. ان البنات واخدة موقف واحد .. لا مش موقف سياسي ولا اجتماعي ولا حتى أحمد حلمي ده موقف من الجواز قال ايه البنات مش عايزين يتجوزوا وكلهم مش بيفكروا في الحكاية دي خالص ، الحكاية كانت في المدرسة بنات المدرسة كلهم على اختلاف أشكالهم والوانهم متفقين على نفس الكلام : أنا مش عاوزة أتجوز ومش بافكر خالص في الحكاية دي .. لما أدخل الجامعة واشتغل أبقى أفكر .وبص بقى لو واحدة ارتبطت بواحد وهما في أولى ثانوي هتكلمه عن أسماء عيالهم ولون حيطان البيت والسجاجيد وهتنسى الموقف بتاع زمان خالص وكأنها ما قالتش حاجة .في الكلية الفكرة مختلفة كل بنت بتدخل الجامعة وبتقول انها جاية تدرس وتتخرج وبعدين تبقى تفكر في حكاية التعرف على رجالة أو الجواز .هما أسبوعين لا غير وبمجرد أن تتعرف على شلة ولاد هتنسى كلامها ولو ارتبطت بواحد منهم هتسمع كلام تاني خالص عن ازاي هو هيساعدها وهيشجعها على العمل والدراسة ده حتى يا أخي المرأة نصف المجتمع ووراء كل ست عظيمة رجل أعظم بيعرف يطبخ ويغسل وبيحب قعدة البيت وأدي الموقف بتاعها كمان راح في الكازوزة ، نيجي بقى للبنات اللي اتخرجت دول بقى حكايتهم حكاية وهي لأن البنات بتبدأ تحس بالخطر وإن كلامها بتاع زمان مش هيجيب نتيجة وإن الخطر قادمُ قادم ..وده مش عشان لا سمح الله هما وحشين بس علشان الظروف الاقتصادية وارتفاع قيمة الدولار وايضا ارتفاع نسبة البطالة واضمحلال المعايير والاخلاقيات وإن ما حدش عنده دم عشان يبص لهم ويبدأ كلامهم يتغير وتبدأ البنات تحاول تخفي فكرة إنها هتعنس بانشغالها بالشغل وبتقول كده للناس ودي بتكون بداية الصدام والخناقات بين المجتمع والبنات فالمجتمع بيقول عليهم عوانس وبيبدأ يرفضهم والبنات بتتقوقع على نفسها وترفض المجتمع والمشكلة في الآخر بتتكلكع وتتعك أكثر من كلكعة موقف أحمد حلمي الساعة 2 الضهر

جريدة الدستور 9/11/2005

"التمثيل سر تغيير نغمة "قصاد عينى" إلى"كلهم بيقولوا كده فى الأول



"إنتى البنت إللى فى خيالى نفس الشعر و نفس العينين و نفس الجسم و..." دى أول جملة الولاد بيقولوها للبنات فى بداية إشتغالاتهم لبعض و طبعا بيكون رد البنات "إنت فارس أحلامى ناقصك حصان و خوذة و تبقى صورة طبق الأصل للواد إللى باحلم بيه" الحياة بتفضل طبيعية لمدة شهر تقريبا فى كل مقابلة الولد بيحلق دقنه و بيمسح الجزمة و يغسل سنانه و يكوى هدومه و البنت بتسرح شعرها و تحط ميك اب و بتلبس هدوم شيك و لكن بعد مرور الشهر إياه كل واحد بيزهق من التانى .. الولد بيرجع للكورة و لعب الاستيميشن و قعدة القهوة و البنت بترجع لصاحباتها و النميمة و الفرجة على التليفزيون و الرقص فى أوضة النوم و بعد ما كان حاطط لها نغمة "قصاد عينى" بقى يحطلها نغمة "كلهم بيقولوا كده فى الأول" ، السبب الحقيقى للمشاكل دى إن كل واحد بيزهق من التمثيل على التانى و بيبدأ كل واحد يظهر على طبيعته ، الولد بقى بيتأخر على معاده مع البنت ساعة و بيروح يلاقيها لسه ماجاتش و بينزل ضارب شعره جيل و منعكشه و مربى ذقنه و البنت بتيجى لمه شعرها بتوكة و من غير ميك آب .. و بعد ما كان بيشدلها الكرسى علشان تقعد بقى بينقى
الكرسى النضيف و يقعد عليه و بعد ما كانت بتصمم إنها تشرب أى حاجة على مزاجه مابقتش تشرب غير قهوة سادة زى اليوم الإسود إللى مش هيعدى ، العيوب إللى كانت مستخبيه كلها ورا التمثيل بتاع أول شهر حب بتظهر و كل واحد بيقول للتانى انه لازم يتغير علشانه لو بيحبه بعد ما كان الواد بيقولها إنه عارف إن مشكلته انه عصبى و هى ترد عليه مش مهم يا حبيبى أنا هاستحمل و مش هاستفزك و اول ما يتنرفز عليها و شها بيتقلب و الدنيا بتضلم و بتتقمص شخصية منى زكى فى فيلم خالتى فرنسا و هاتك يا ردح و الموضوع كتير بيتطور ليصل إلى إشتباك بالأيدى و طبعا الولد مش هيسكت و البنت هاترجع رابطة عينيها و الولد هيرجع مجبس رجله و بعدين هيرجعوا لبعض تانى ، و لو قعدوا فى المطعم ياكلوا و هو عارف إنها مش بتحب الشطة مثلا هيدلق إزازة الشطة كلها فى الطبق إللى قدامها و هيقولها علشان تتعودى لما نتجوز و طبعا علشان ما تحصلش إصابات زى الحادثة إللى فاتت بتضطر تاكل و لو إتصلت به فى وقت متأخر فى البيت يقولها إقفلى دلوقتى عاوز أنام كلمينى بكره و لو إتصل بيها على الموبايل تقوله بابا قاعد معايا فى الأوضة و تقفل فى وشه السكة ، كل واحد بيكون مصمم إن التانى يتغير علشان يقدروا يكملوا مع بعض و الرد الطبيعى بيكون أنا كده و عمرى ما هاتغير عجبك على ماشى .. مش عاجبك كل واحد يروح لحاله ، المشكلة إن كل واحد مش بيصارح إللى بيحبه بكل حاجة بيفتكر إنه لو قال الحقيقة الطرف التانى هيقلبه ، لو بيحبوا بعض صحيح الإثنين هيستحملوا بس المشكلة إن ده كله تمثيل فى تمثيل و لما بيزهقوا كل حاجة بتظهر على حقيقتها.

الدستور 14/12/2005

٠٣‏/٠٣‏/٢٠٠٦

أنا

طظ فيكي و في عنيكي
شعرك و إديكي
عشان أنا مش ليكي

أحمد فؤاد الدين

أنا

كل حاجة فيكي بقت غبية
لون شعرك .... عنيكي
حتي حبك ليا

أحمد فؤاد الدين

١٥‏/٠٢‏/٢٠٠٦


الحياة عندما لا تستطيع مواجهتها اتركها و أبكي Posted by Picasa


Posted by Picasa

٠٥‏/٠٢‏/٢٠٠٦

nothing

Hello

٢٣‏/٠١‏/٢٠٠٦

عندما أتحد العرب.......

لا يوجد إنسان عربي علي وجه البسيطة غير مؤمن بأن أتحاد العرب سيكون أقوي أتحاد عرفه التاريخ و أن ذلك الأتحاد سيقضي علي أمريكا و إسرائيل و سنحتل العالم بأسره لنصبح القوي الوحيدة في العالم بلا منازع لذلك فإن العالم كله يحارب أتفاقنا أو أتحادنا و يأتي علي رأس القائمة المعادية للأتحاد إسرائيل و أمريكا ,ولكن بأمارة إية؟! لقد أتحد العرب في مواضع كثيرة و أجتمعوا علي مواقف واحدة ولكن ما النتيجة؟! النتيجة في الواقع لا شيء بل يمكن القول أننا أنحدرنا لنسقط خلف اللا شيء .
أجتمع العرب في عام1948 لتكون أكبر أنتكاسة عرفها التاريخ العربي المعاصر في رأيي وهي أحتلال فلسطين وإنشاء وطن لليهود تلاه نكسة 67التي ضاع فيها ماتبقي من كرامتنا مع بعض الأراضي وأجتمع العرب مئات المرات في إجتماعتهم المسماه القمم ليخرجوا بنفس اللاشيء و لكن اكبر أتحاد للعرب جلب لهم وللدول الإسلامية ما لم نكن نتوقعه من قبل الأحتلال الأمريكي إنه تنظيم القاعدة أكبر أتحاد عربي قائم هو بالفعل تعبير عن أتحاد العرب فالتنظيم الإرهابي يتكون هيكله الأساسي من معظم الدول العربية ولكن مع توزيع المناصب و الحصص حسب مكانة كل دولة و كعادتها مصر الرائدة أحتلت الصدارة مع السعودية فلمصر أربع أعضاء مؤثريين هم أيمن الظواهري اليد اليمنى واليسري لبن لادن وكذلك طبيبة الخاص ,وثانيهم هو المصري الملقب بسيف الدولةاسمه الأصلي محمد إبراهيم مكاوي وهو رئيس جهاز الأمن,أما ثالثهم فهو أبو محمد المصري مدير المعسكرات التدريبية بأفغانستان , و رابعهم هو ثروت صلاح شحاتة نائب الظواهري في حركة الجهاد .
أما السعودية فبالرغم من أنها لا تملك غير ثلاث مقاعد رئيسية فإن منصب الرئيس من نصيبها فرأس القاعدة هو أسامة بن لادن الغني عن التعريف , و الشخصين الآخرين هم شيخ سعيد زوج بنت بن لادن و قائد خلية التدريب في هجمات الحادي عشر من سبتمبر , و معه أبو زبيدة و يعمل قائدا ميدانيا في القاعدة .
و تتوزع باقي المقاعد علي الأردن متمثله في أبو مصعب الزرقاوي الرجل الأول للقاعدة في العراق كما يزعم الأمريكان و الكويتي المنزوع الجنسية سليمان أبو الغيث المتحدث الرسمي بأسم التنظيم واليمني رمزي بن الشيبة الذي ألقي القبض عليه و تحمله أمريكا مسئوليه تدمير المدمرة كول والسوري محمد حيد زمار المسئول عن تجنيد محمد عطا المصري و أحد المسئولين عن تفجير برجي التجارة والمغربي زكريا موسوي وهو أحد المسئولين عن تجنيد المنتحرين في هجمات الحادي عشر من سبتمبر .
هذا هو أتحادكم أيها العرب ماذا فعلتم لمحو هذه الصورة.... بالطبع لا شيء سوا الشجب و الإدانة وبالكاد نزع الجنسية, يمكنني أن أقولها الأن يا عرب لا تتحدوا !!

مصر الجديدة

أثناء تناولي للعشاء أمس قمت بصناعه أول مكوك فضائي يحمل بني آداميين و يستطيع الذهاب للمريخ , أنتهيت من العشاء ثم أخذت الدائري الفضائي لأذهب إلي مصر فرع المريخ – دي غير مصر اللي إحنا عايشين عليها- بعد ما خرجت من الجوازات التي لم أنتظر فيها مطلقا أوقفت أحد سيارات التاكسي المسماه بتاكسي العاصمة التاكسي آخر موديل الأجرة محددة لكل مكان السائق غايه في الأحترام لا يتكلم كثيرا و كمان العداد ديجيتال,أستوقفني كثرة الصور المعلقة في الشوارع و مع ذلك تبدو الشوارع نظيفة جدا فسألت السائق عن السبب لأعرف أن اليوم هو يوم الاستفتاء علي تعديل الدستور –ليس مادة فيه- وذلك لتقليل بعض الإمتيازات التي يحصل عليها رئيس الجمهورية التي هي أصلا قليله علي حد زعمه وهذه الصور لبعض رؤساء الأحزاب, فطلبت منه عدم الذهاب إلي الفندق لأري ماذا سيحدث في هذه المعركة , سألت السائق عن بعض أحوال البلد , بدأت بسعر الجنية فرد قائلا أن الحكومة تسعى لتخفيض الجنية الجامح حتي لا تتأثر الصادرات المصرية للدول الخارجية , وجدت أمامي أحد الجرائد فمددت يدي لأقراه و سألت السائق هو الجرنان ده حكومي ولأ معارضة؟ قالي يابيه الجرائد دي بتاعت الشعب مش بتاعت أي حد , المهم فتحت الجرنان لأجد أخبار كثيرة في الصفحة الأولي مانشيت بالبنط العريض "ضياع فوز سهل لمنتخب مصر أمام نظيره الأرجنتيني في آخر مباريات الدور الأول لكأس العالم وبالرغم من ذلك تصدرت مصر المجموعة" سألت السائق هي مصر أتأهلت لكأس العالم يعني عدينا تصفيات كأس العالم ؟ رد و قد ظهرت علي وجهه علامات الآسى :آه ما ولاد الأبلسه لو كانوا غلبوا البرازيل في الدور قبل النهائي البطولة الي فاتت كنا هنقطع الصين في النهائي و مانحتاجش للتصفيات الي بترهق لاعبتنا علشان دوري أبطال أوروبا زودوا الفرق بتاعته , أصابتني حالة أندهاش جعلت السائق غاية في الأستغراب وقالي: فيه حاجة ؟! بصراحة سكت وقلت أكمل الجرنان أحسن . بقيت الأخبار معظمها علميه عن محاولات مصرية لتشغيل السيارات بماء البحر بدلا من الماء النقي! ,سألت السائق: فين صورة الرئيس ؟ بحلق فيا المرة دي جامد وقالي: دور عليه يمكن تلاقيله صورة له أو مقال جوه الجرنان ,لأول مرة أحس بدوار داخل سيارة ,مقال طب رئيس التحرير بيكتب فين في صفحة الوفيات !! ,رد : لا الصراحة هو ماكتبش النهاردة لكن هو بيكتب في صفحة الفن ص12. قبل أن أفيق من الصدمة توقفنا في أحد الإشارات وشاهدت شخص يهيأ لي أني شاهدته من قبل نظرت في الجريدة التي في يدي لأجده وزير الدولة للبحث العلمي سألت السائق : مش ده... قاطعني قائلا :آه ده وزير البحث العلمي الراجل ده كان كويس أول 6شهور مش عارفيين إيه اللي حصله علي العموم شكله هتتسحب منه الثقة هو كمان الناس ما بتتعلمش من أخطاء اللي سبقوهم , لم ينقذ رأسي من الصداع سوا سير الطريق الإشارة فتحت ما طولتش ,وجدت السائق قرفان سألته فيه حاجه يا أسطى قالي: مش عارف الإشارة دي هيشيلوها إمتي أنا لازم أقدم شكوي للمحافظ ,دي خلاص بقت الإشارة الوحيدة في البلد كلها دي ممكن يطير فيها وزير . وصلنا أخيرا لمقر الأستفتاء مش سامع حس و لا خبر سألت السائق: هما الناس فين أشار لي علي الناحية الأخري من الرصيف و قال: أصل أهل المنطقة دي مقاطعين الأنتخابات علشان المنطقة دي معظمها من حزب الوحدة ده حزب جديد معظمه من أهل المنطقة يقودهم نائب دايرتهم .بأستغراب طب فين الأمن المركزي و البلطجية رد أكثر أستغرابا بلطجية مين هو حد يقدر يتعدى علي حريةالتعبيرعن الرأي ده حق من حقوق الشعب اللي كفلها لهم الدستور , طلبت من السائق الذهاب إلي أي دائرة أخري طلب مني الذهاب إلي دائرته الأنتخابية أو أن أستقل تاكسي آخر لأنه لا يستطيع تفوت الأستفتاء وافقت علي الفور لإحساسي بوطنية السائق, المنظر الان مختلف تماما هناك الكثير من الناس و اللافتات كثيرة تطالب بتعديل الدستور وبرضه مش لاقي عساكر أمن مركزي فجأة وقعت عيني علي ضابط ذهبت لأساله ممكن أدلي بصوتي لو أنا مش من هنا رد بمنتهي الأحترام: حضرتك تقدر تصوت في أي لجنة طالما إنك مصري حتي لو جاي من الأرض وتبع ذلك بضحكة لذيذة لم أعهدها منهم – الضباط- أثناء إدلاء السائق برأيه في التعديل وجدت بوادر خناقة بصراحة أتبسطت قلت هي دي مصر اللي أنا عارفها ده أنا كنت قربت أنسى و لكن خيب الظابط ظني و جري لفض الأشتباك الذي أتضح إنه خناقة بين جيران ملهمش دعوة بالأنتخابات , رجعنا للسيارة وأوصلني السائق للفندق نظرت للمبلغ الظاهر علي العداد وجدته حوالي 9 جنيهات يا بلاش أخرجت من جيبي عشرة جنية مش خسارة في الرحلة دي و فجأة سمعت صوت غليظ بيقولي: عشرة جنية إية ده يا أفندي بقي من العباسية للتحرير في عز الضهر و تقولي عشرة حنية. الظاهر إننا رجعنا لمصر الأرضية أنا لازم أبطل عادت النوم في التاكسي, أشوفكم في عطارد الأسبوع اللي جاي.

بث تجريبي واحد..... إتنين.....خمسة ......قشطة الدنيا مظبوطة .
أنتظروا المزيد
علي إية