حدث في مثل هذا اليوم
20 5 1985
مولد الطفل أحمد فؤاد الدين
20 5 1988
الإحتفال بصعود الطفل لدوري الحضانة
20 5 1990
الإحتفال بالصعود للمرحلة الإبتدائية
20 5 1995
الإحتفال بالشهادة الكبيرة ( الأولي) بالحصول علي مجموع 92و شوية فكة في المية في خمسة إبتدائي.
20 5 1998
الإحتفال بالشهادة الكبيرة ( الثانية ) بالحصول علي مجموع مش فاكره في 3 إعدادي
20 5 2001
تم إحتساب الشاب أحمد فؤاد الدين راجل في سجلات الحكومة لكن دون الحق في التصرف في ميراثه أو ممتلكاته أو طينة و بقرة .
20 5 2002
قاعد بأتفرج علي متش البرازيل و تركيا في كأس العالم 2002 و مجدي عبد الغني كان بيعلق الله يخرب بيته ( جبت مجموع 96 في المية ) كتني وكسه يا رب مكنتش جبت 80 في الميه و لا حاجة
20 5 2003
إمتحان رياضة 2 في إعدادي هندسة ( سقطت السنة دي علي فكرة )
20 5 2004
إمتحان رياضة 2 برضه تانية إعدادي هندسة ( هيه هيه هيه نجحت السنة دي ) لم يتكرر هذا الإنجاز حتي الآن .
20 5 2005
إمتحان رياضة 4 ( أولي مدني) سقطت برضه
20 5 2006
إمتحان رياضة 4 برضه (أولي كهرباء) و في نفس اليوم الإحتفال بعيد ميلادي في الدستور برفقه ناس كويسه و ناس ولاد كلب .
تم إحتساب المذكور أعلاه عالة علي الدولة و له حق التصرف في مائة جنية في البوسطة .
20 5 2007
قاعد علي مكتبي في MBC.net بأكتب شغل و بأستعد للذهاب للإحتفال بعيد ميلادي ال22 مع أصدقائي الأعزاء , العيد ميلاد ده عملته حبيبتي أميرة ( يا رب نتجوز بقي يا حبيبتي) .
ملحوظة إمتحان الرياضة 4 بقي يوم 26 ( هيه هيه هيه هيه هيه هيه)
شكر خاص :
حبيبتي بجد أنا مش عارف أشكرك إزاي علي الوقت اللي كلمتيني فيه من الساعة 12 من أول لحظة في سنتي الجديدة , بجد أنا عمري ما كنت فرحان بعيد ميلادي قد ما كنت فرحان بيه و أنت معايا يا حبيبتي ....
بحبك قووووووووووووووووووووووي
التسميات:
انا
