٠٣‏/٠٤‏/٢٠٠٧

قاطعوا المصري اليوم من أجل حريتنا


قبل أن أبدا في هذه التدوينة عاوز اقولكم حاجة صغيرة أنا مش شيوعي و لا يساري و لا ليبرالي و لا إخوان و اراهم كلهم في الغالب فشلة أو اغبية أو مضطهدين لكني لا أنتمي لأي منهم و لا أرغب في ذلك الآن و بالطبع لست حزب وطني و أكره النظام الحاكم كراهية بالفطرة و مبسوط جداااااااااااااااااااااااااااااااااااا للي بأشوفه من إضرابات عمالية في كل مصر لأن ده اللي لازم يحصل لازم الناس تطالب بحقها و هي بتعمل الصح مع ناس ولاد ****, طيب ندخل في الموضوع , نشرت جريدة المصري اليوم مانشت كبييييييييييييير قوي عن تصريح للاستاذ محمود أمين العالم أنا معرفوش بصراحة -لجهل مني بالطبع- بس ده اللي حاصل المانشيت مكتوب فيه الشيوعيين عادوا بتنظيم سري جديد من الإسكندرية إلي أسوان , كوادر التنظيم وراء الإضرابات العمالية الأخيرة و بعض رموز التجمع و الناصري ضمن التنظيم, يا حلاوة بغض النظر عن صحة الكلام ده أو لا فكلام المصري اليوم عبارة عن تقرير أمني مطول مصور أخطاء طريقة للقراء , إذن عندنا اختيارين إما إن التقرير الأمني صحيح و ده معناه إن الأستاذ محمود أمين العالم لا مؤاخذة بيهوبص بالصاد و بالسين و اللي بيقوله ده معناه إنه خرف من زمان و لازم يسكت خالص و يبطل كلام لو كان مش عارف هو بيقول إيه أنا ما أعرفكش يا استاذ محمود يا مفكر يا كبير بس الوحيد اللي ممكن يعمل اللي أنت عملته هو أختي آلاء ذات الثلاثة أعوام , طب لو أفترضنا إن ده كلام منسوب للأستاذ محمود يبقي الراجل مالوش ذنب و المصري اليوم هي السبب طب ليه المصري تعمل كده؟ بسيطة خالص عشان المصري جرنان أمريكي أو أجندته أمريكية لا بيتكلم عن أمريكا و لا الرئيس و دايماً يصدر المشاكل المدنية علي طول الخط و دايماً يخلق مشاكل مش موجودة و دايما و دايما و دايما مش أنا اللي هأقول إن المصري اليوم أمريكي لكن ده حقيقة واضحة قوي قوي ممكن توصلولها في ثلاث أعداد من المصري اليوم قراءة جيدة تعرف النتيجة علي طول , في جميع الأحوال سواء كان التقرير حقيقي أو مضروب فلتذهب المصري اليوم إلي الجحيم إلي الجحيم قوي كمان أنا خلاص قررت إني مش هأشتريها و لو شفت حد بيشتريها هأمنعه من أنه يشتريها يبقي يقرأها من علي النت لو محتاجها قوي و يبقي كمان يركز في كل خبر بتنشره لأنها بتهوبص و يا ريت كلنا نقاطع المصري اليوم و أنا بأطالبكم بأنكم تقاطعوا المصري اليوم

هناك ١٨ تعليقًا:

عباس العبد يقول...

انا معاك فى الى انت قلته
بس خد بالك
امين العالمده
مفكر جامد فعلا و يستحق القراءة
و فعلا انا مش فاهم
ازاى تنظيم سرى و ازاى يعلن عنه
مش فاهم دى
بس مش لدرجة المقاطعة
علشان مقال
و بعدين من ساعة ما طلعت المصرى اليوم و احنا عارفين ان ليها اجندة امريكية
لسه واخد بالك من العدد بتاع انهاردة

أحمد فؤاد الدين يقول...

لا يا باشا بس كنت باقول و ايه يعني ما كل الجرايد ليها اجندتهاالخاصة طالما بتكشف حاجات تعري النظام مفيش مشكلة لكن المرة دي بتلعب علي كبير دي بتضرب فينا إحنا بتضرب في الشعب بتضرب في العمال بتضرب في الثورة اللي احنا مستنينها من زمان قوي قوي قوي و ما صدقنا لقينا اللي يقدر يكبرها شوية و يظهرها في نفوس الناس

elkamhawi يقول...

كلامك مظبوط قوى يا كبير
ولاجلك ولاجل مصر والمصرين سنقاطع جميعاً المصرى اليوم (مغفل) بب

~ Bato0ot ~ يقول...

fe3lan 3ndak 7a2 :S ana kman msh hagebaha tany

Amira Hassan يقول...

و الله يا حبيبي انا كنت بحب المصري اليوم جدا

بس مش كنت اعرف الحوارات دي كلها..عمتا انا كده كده مش بشتريها و غالبا بشوفها اونلاين و لو لسه بحبها يعني هقاطعها عشانك ;)

ROMIL يقول...

أقعد ساكت

ROMIL

غير معرف يقول...

لا مؤاخذة يا فؤاد ممكن أعترض ؟
أولا المصري اليوم ما يقدروش يتبلوا على الراجل لأنه أولا مفكر كبير جدا و ثانيا المصري اليوم مهنيا أحسن جرنان في مصر بلا منازع (شوفت مأساة الدستور اليومي)؟
وسيبك بقى من حوار الأجندات و النتايج وكلام مصطفى بكري ده.
الفكرة كلها أن محمود أمين العالم و هو بالمناسبة من كبار المفكرين الماركسيين في مصر فعشان كدة نفسه بتصورله ان -و العياذ بالله- في تنظيم شيوعي بين العمال ،دي أمنيته الأخيرة قبل ما يودع :).
صدقني المانشيت ده مالوش أي قيمة لا عند المباحث و لا عند اليسار و لا عند أمه يا أدهم.
يا ابني لو متضايق من حد في البلد دي قول عليه إخوان ،تقارير الأمن كلها نفس الإسطمبة ما فيش أي ابتكار.
هو يا يعني الأمن مستني أمين العالم عشان يغبوا علي العمال ....يا عم هايقولوا أن ولد فال بتاع موريتانيا بيمولهم ، اعترض بقى :).
سلامو عليكم
OPAMP

أحمد فؤاد الدين يقول...

ماشي يا عم المجهول يا اوب امب يا مكهرب بص بقي حتي لو ده مش تقرير امني فيكفي كلمة شيوعي عشان تلغي اي تعاطف شعبي مع الإضرابات انا اول مرة اشوف الناس و اصحابي اللي مالهومش في السياسة بيتعاطفوا مع اللي بيحصل لما تحطلهم كلمة شيوعي تبقي خلصت خلاص فهمت قصدي
IC

أحمد فؤاد الدين يقول...

اه صحيح بمناسبة المهنية راجع عدد المصري اللي كانوا عاملين في تحقيق عن المستشفيات و دخلوا صورا فيه و راجع كل التحقيقات المتعلقة بالمجتمع المدني

Malek يقول...

فؤاد باشا كالعاده هختلف معاك
انا لسه سامع عن البنى أدم ده أمبارح و برضه لجهل منى مكنتش اعرفه و شفته فى برنامج اليوم السابع لما كان ليه مداخله مع اسامه الباز ما علينا مش موضوعنا.
اللى انا عاوز اقوله حاجه واحده صغيره ان انا ضد مبدأ المقاطعه اساسا سواء فى انتخابات او فى حاله زى كده .
أصل كده انت ببساطه بتصف القراء انهم قٌصر أو بمعنى اخر هيمشوا ورا اى كلام يسمعوه انا من رأيي ان كل واحد يقرا كل حاجه و فى الاخر يمشى ورا اللى حاسه و مصدقه
اما ان البنى ادم ده شيوعى و بتاع تنظيم و انه هيوقف الثوره المنتظره و الكلام ده كله انا مليش فيه
أياكش تولع

أحمد فؤاد الدين يقول...

و الله يا محمد مفيش في مصر حد بيمشي ورا إحساسه غير الست روبي:)

Malek يقول...

يا جامد ايوه كده أتكلم فى حاجه مهمه مش يسارى و شيوعى و تنظيمات و مصرى اليوم و مقاطعه

غير معرف يقول...

هو لسه فيه حاجه اسمها ماركسيه ... الراجن دا بجد شكله بيهرطق
والمصرى اليوم عامت على عومه ... وبعدين المصرى اليوم عايشه دور الحياد والناس المحترمين وبتاع.... متهيألى ان حمدى رزق لوحده سبب كافى للمقاطعه اصلا ...

...

بس خلاص

سلامو عليكو

خيرالدين يقول...

لوهنقاطع علشان راى او شخص يبقى سليمان جوده وحمدى رزق يخلوا المصرى اليوم تبيع مناديل وبمناسبة الاجنده هى ايه اجندة الدستور ؟؟حتى الجرايد اللى المفروض مشتقله بتشتغلنا؟؟؟ وبتعلن-واخد بالك من تعلن- عن تنظيم سرى ياحلاوه ياحلاوه
نقرأ ايه طيب ياجدعان

3aziz 3eni يقول...

بقالى كثير جدا من ساعة ما عرفت امسك الجرنال واقراءة ما لقيتش جرنال بيعرف يعنى ايه يكلم الناس بجد
لكن فيه جرايد بتعرف تكتب صحافة وفيه جرايد بتعرف تفضح وفيه جرايد بتعرف تهيج الناس وفيه جرايد بتعرف تقول كلام اهبل وفيه جرايد بتصقف للحكومة وفيه جرايد المفروض مستقلة لكن بتكتب بناءا على تعليمات بعض رجال الحكومة

بص ما فيش غير ميكى جيب هى الوحيدة اللى بتعرف تكتب لقراءها

ربنا يسترها يا احمد

غير معرف يقول...

السلام عليكم ورحمه الله وبركاتة
أخى فى الله أنا بجد مش فاهمة أنا قديما كنت بقرأالأهرام دلوقتى الجريدة الوحيدة اللى بشتريها هى المصرى اليوم أنا بجد بحس أنها بتكشف الحكومة وبتعرض مشاكل المجتمع المصرى زى ماهى مفيهاش مبالغة
ومحستش أنها ليها سياسة مع أمريكا وخاصة أن الكتاب اللى بيكتبو فيها ناس أنا بحترمهم جدا زى مجدى مهنا
وخيرى رمضان وغيرهم
ممكن سؤال هل معنى أنها بتعارض الحكومة يبقى هى ليها أجندة أمريكية ؟
بصراحة أنا مش فاهمة وبجد والله عايزة أفهم

.:.-=- ELGaZaLy-=-.:. يقول...

السلام عليكم ورحمة الله وبركاته

غريب امرك للغاية بحق...

انظر الى بداية كلماتك وحدد انت بنفسك
-----------------------------
قبل أن أبدا في هذه التدوينة عاوز اقولكم حاجة صغيرة أنا مش شيوعي و لا يساري و لا ليبرالي و لا إخوان و اراهم كلهم في الغالب فشلة أو اغبية أو مضطهدين لكني لا أنتمي لأي منهم و لا أرغب في ذلك الآن
---------------------------
من حقك ان تكون انت كما تكون بلا مسميات لكن ليس من حقك ان تنعت بشر بالغباء والا فالمقابل الذى تنتظرة ان ينعتوك بالفاشل او الغبى او او ويبقى فى النهاية هوا انك بصراحة او بوقاحة ان اردتها تهاجم لجرد ان تثبت انك ليس لك انتماء واضح

انا ستقل ايضاء بحب مصر بدون اى اقرارت حزبية ولكنى لم اتهم اى احد بالغباء او الفشل لمجرد انى شايف كدة


-------------------

ندخل فى الموضوع

انا اساسا بطلت اقرى المصري اليوم

من زمان اوى يمكن لضيق وقت او لظروف سفرى المتكرر معرفش بالظبط بس هارجع للمقال دة من اى مكان وارد عليك تانى اذا سمحت

تحياتى يا من يرى الجميع اغبياء...

عطاالله النديم يقول...

ههههه .. الناس نفسها تقاطع المصرى اليوم وأى جريدة تانية عشان يوفروا فلوس شوية ..
انا عن نفسى مقاطع المصرى اليوم من قبل كده بس عشان أسباب تانية متعلقة برضة بتحيز الجريدة للحكومة ضد المعارضة رغم ادعائها انها مش تبع دى ولا دى ..
وببشرك هى فى طريقها لتصل الى مكانة روز اليوسف .. وربنا يهدى