11‏/03‏/2007

قال اتحاد قال


في يوم الجمعة الفائت -حلوة الفائت دي- كنت قاعد علي البورصة لا بيا و لا عليا و إذا بالسيد أحمد هواري أحمد يطلب مني إني أروح معاه إجتماع المدونين قولت يا واد طنش خالص و مع ذلك الراجل أصر و قمنا رايحين أنا و أميرة حيبتي و لميا و السيد مودي كلمة في عربيته - الله يكرمه - قعدنا في إجتماع المدونين و قررت السيدة ياسمين إن إحنا لازم نعمل اتحاد أو جمعية للمدونين و هذا ما أعترضت عليه شدة و عشان كده كتبت التدوينة العقيمة دي و عشان أقولهم نفضوا للحوار بتاع الاتحاد ده و خلونا نشتغل بجد و نعمل حملات ليها معني أحسن من الشيء العجيب اللي مش لاقيله توصيف غير عبث و دمتم

* الصورة الملحقة بالتدوينة عجبتني عشان كده حطيتها

05‏/03‏/2007

أســـــــــــــــــــــــــــــــــف


أنا بقالي عشرين يوم ما دونتش اكتشفت ده النهارده بس لما شوفت تاريخ آخر بوست لأميرة حبيبتي و استغربت اني قدرت ما أدونش طول الفترة دي بس عرفت السبب إن كان فيا اللي مكفيني بجد أنا كنت قرفان و طالع *** بس للأسف أنا زعلت ناس كتير كعادتي و أنا مضايق و عشان أنا بجد بأحبهم أنا قررت أن تدوينة العودة تكون ليهم لأني ماليش غيرهم

أبدا بمين مش عارف اللي زعلانين مني كتير قوي طب أبدا بيكي يا حبيبتي عارف إنك بتحبيني و هو ده اللي مخليكي مستحملاني و مستحمله هبلي و عفرتي بس أنا أسف إني كنت بأضايقك في الفترة اللي فاتت بس و الله أنا بحبك قوي و أسف قوي إني في لحظة ضايقتك بجد أنا أسف و رغم إن الكلمة دي بقت قليلة قوي علي اللي بأعمله بس غصب عني و الله يا حبيبتي

طب مين تاني زعلته ياااااااااه دول كتير قوي طب براء مثلاً اوكا

براء صديقي العزيز اللي لسه ما عداش علي صداقتنا سنة و وريته اللي ما بيشفهوش اصحاب بقالهم سنين براء أنا أسف بجد و الله غصب عني أنا خاف عليك و عليا و علي دريني إن كل اللي بنعمله يبقي و لا حاجة في الآخر بجد خايف قوي بس عارف أنا كنت غبي قوي و أنا بأعبر عن كده بس و الله مكنش قصدي أنا أسف قوي يا صاحبي اسف بجد مكنش قصدي برضه لسه زعلان طب اقولك قدام الناس إني بأحبك زي أخويا التخين طب يا سيدي بأحبك قوي ياله بقي ما تزعلش أنت قلبك كبير و برضه تاني أنا أسف

فاضل مين ياه دول لسه كتير قوي اه استاذي خالد البلشي

بص بقي يا ريس أنا عارف أن لو أي كائن تاني كان مكانك كان أكيد هيغتالني عشرين مرة علي الأقل في العشرين يوم اللي فاتوا بس و الله أنا أسف قوي مكنش قصدي أقصر في الشغل الدنيا كانت ملخبطة و كنت محتاجك قوي تقرصني من وداني باديك الحنينة عشان أشتغل أنا أسف يا خالد و برضه هأقولك بأحبك قوي و برضه أسف قوي


برضه لسه فاضل كتير قوي ياااه ده أنا وحش قوي مين تاني أنا مضايقه اه صديقي العزيز أحمد الدريني

بص بقي يا دريني علي أد ما أنا ضايقتك أنت زعلتني بأنك حسستني إنك لا تبالي بالشغل بتاعنا رغم إن متأكد إن الكلام ده مجرد هلاوس في دماغي بس لازم رد فعلك عليا يكون أقوي من كده أنا أسف يا صديقي إني ضايقتك بجد أسف قوي مكنش قصدي و الله كان لازم تستحملني لأننا أصحاب قوي و ده اللي مخليني بأتقل عليك أسف يا صديقي العزيز


لسه برضه فاضل كتير اه العزيز جدا و الصديق الجديد و القديم هواري ذا لايف مان

بص يا هواري أنا عارف إن النهارده عيد ميلادك و ده كان كفيل إني أبقي كويس بس أنا أسف إني مضايق و عيد ميلادك النهارده و أسف إني عرفتك متأخر رغم إننا نعرف بعض من فترة طويلة أسف يا صديقي أسف بجد و كل سنة و إحنا أصحاب و أنت سعيد و زي الفل


مين تاني نسيته تصدقوا مش فاكر, اه إزاي نسيت

أحمد فؤاد الدين

أنا أسف قوي يا أحمد أنا طلعت ميتين أهلك اليومين اللي فاتوا قصدي الواحد و عشرين سنة اللي فاتوا بجد يا أحمد أنا بحبك قوي بس مش عارف أنا ليه غبي معاك و ليه بأخسرك ناس بتحبهم قوي مش عارف ليه يا احمد يمكن أنا غبي و يمكن أنت مش بتنصحني أحمد أنا أسف قوي أسف بجد أسف إني كل يوم بأدخلك في حوار جديد و شغل جديد و قرف جديد بس يا أحمد كفاية إني عرفتك علي أميرة اللي أنت بتحبها قوي ممكن تسمحني و تتقبل أسفي عشان الموضوع ده بس عموما يا سيدي أنا أسف بجد أسف قوي أسف لدرجة إني بأفكر أبعد عنك و أسيبك تعيش حياتك بعيد عني يمكن تبقي أحسن أحمد أنا عارف إنك ما كنتش عاوزني أكتب الكلام ده النهارده بس أنا كان لازم أعرف الناس إني مضايقك عشان ما أحسش بالذنب أسف بجد

أسف لكا واحد زعلته أسف لكل إنسان أو حيوان أو جماد زعلته في يوم من الأيام بجد مش قصدي أنا مش بأحب أزعل حد بجد غصب عني أنا أسف سامحوني